Friday, February 19, 2016

தடங்களை பின்தொடர்ந்து

உன் காலடி தடங்களை
பின் தொடர்ந்து
வருகிறேன்
பல சமயங்களில்
காற்றிலும்
மழைகளாலும்
மிருகங்களின் தடங்களிலும்
அது காணமல் போக
தாயிழந்தக் குழந்தையாய்
கண்ணீருடன் தேடுகிறேன்

மீண்டும் எங்காவது 
புதிய தடங்களைப் பார்த்தவுடன்
உற்சாகமாகி பின் தொடர்கிறேன்

நீ ஆணா பெண்ணா அலியா
நான் அறியேன்
உன் தடங்களை மட்டுமே
எத்தனை காலங்களுக்கு
தேடுவது?
உன் பாதங்களை
எப்போது நான் காண்பது?

மிருகங்களும்
புதர்களும்
முட்களும் அடர்ந்திருக்கும்
இந்த காட்டில்
நீ மட்டும் ஏன் 
வெறும் கால்களுடன்
அதுவும் கால்தடங்களை
பதித்தப்படி பயணிக்கிறாய்?
எந்தத் தேசத்தை நோக்கி?
எத்தனை காயங்களுடன்?

இதை அறிந்துக் கொள்வதை
தவிர
வேறெதுவும் நான் வேண்டேன்

No comments: