Tuesday, February 23, 2010

தீர்ந்துப் போனப்பின்

அளவற்ற என்னுடைய அன்பை
நான் உங்களுடன் வாழ்ந்த நாட்களில்
நான் அறியாது
கொஞ்சம் எடுத்திருக்கிறீர்கள்

சிகரம் தொடும் உழை ப்பில்
உடமைகள் பற்றிய
எனது கவனக்குறைவில்
அதை கொஞ்சம்
களவாடியிருக்கிறீர்கள்

நீங்கள் வீழ்ந்த தருணங்களில்
உங்கள் கண்ணீர் பொழுதுகளில்
உங்கள் தனிமை யில்
உங்கள் தோல்வியில்
உங்களை மீண்டும் உயிர்ப்பிக்க
நான் கொஞ்சம் கொடுத்ததை
நீங்கள் திருப்பி தரவேயில்லை

நீங்கள் பிறருக்கு கடன் தர
பல சமயங்களில்
இவைகளை யெல்லாம்
என்னிடம் இருந்து
வாங்கி சென்றிருக்கிறீர்கள்

இன்று
நீங்கள் ஆச்சரியப்படும் உயரத்தில்,
நீங்கள் விரும்பிய தோற்றத்தில்
ஆணவமாய் வீற்றிருக்கும் என்னில்
நீங்கள் இனியும் எதிர்பார்க்கவே முடியாது
என்னில் தீர்ந்துப் போன
அந்த அன்பை

எனக்காக
என்னுடைய தேவைக்கு
வைத்திருக்கும் கொஞ்சமும்
முற்றிலும் தீர்ந்தவுடன்
ஒரு சர்வாதிகாரியாய் மட்டுமே
நான் இருக்க நேரிடும்

ஒருவேளை நீங்கள் இதுவரை
மிகவும் அஞ்சிய
உங்களது அகால மரணமாக
நான் இருக்க கூடும்

இல்லை
உங்கள் கற்பனையில் மட்டுமே
உருப்பெற்றிருந்த
சாத்தானாகக் கூடும்